تمشي لأنك مو قدران تشوف هاد الشخص غير بمطرح واحد,أصلن انت بحياتك ماقدرت تكون بدور ثانوي و تقبل بمحل الرفيق و بس, بتعرف ليش؟ لأنك أناني أو لاء لأنك عربي و العادات يلي انت بتضحك عليها معشّشة فيك,وقد ما اتوهمت انك غير عن الكلّ بتضل متلن تماماً.
طب تبقى لانو هاد الشخص محتاجك هلأ أو انت محتاجو,مو مهم مين محتاج مين الفكرة انو بهيك ظروف الواحد بدّو شي يتمسك في,يرجعلو لما يكون قرفان عمرو من أخبار القتل والضرب,لما يكون ضايج انو مافي شغل, لما بتطفي الكهربا,انو رفقات عمرو ما ضل حدا فيهن جنبو...تعودت علي ,يمكن اكتر من هيك,معقول بلشت تحبو! بس ما صرلك زمان بتعرفو,ع كلن مافي شي غريب ما انت فنان و طول عمرك بدك تعيش الحالة.
بس اسمحلي كان لازم تكون أشطر من هيك,تعرف لحالك, ما تتورط, كانت من الأول واضحة الكارثة الطبيعية يلّي بدا تصير لما شخصية اقتحامية,غامضة و خارجة عن القانون متلك تكون بحضور الشخصيات المستفزة, المتناقضة والصارخة , كنت بتعرف بس دائما عندك أمل و بتشوف الشغلات متل ما بدك ياها انت تكون...بدك رأيي تصرّف و كأنو مو فارق معك وعادي,اصلن عنجد بعد كل شي عم تشوفو بهالبلد لسّا فيك احساس و بدك تعمل طقوس طرد ارواح و تأمّل, لك خلص نحنا شعب تعوّد ع الخسارات و أي شعور تاني صار شي خارج عن المألوف.
 طيب سمعني ,علمونا أنو الجبال ما بتتلاقى ! بس ما عم افهم ليش نحنا التقينا؟ّ! اخر شخص بحياتي بيخطرلي أنو اتعرّف علي ويمكن التقينا مرّات قليلة بس الدفا يلي بعيونو بذكرك بالشام و حاراتا و صوت أمك لما تناديلك,عيونو الوطن يلي راح والأمل الجاية...بتعرف اطول مرة حكينا كانت دقايق بس صوتو رجعلي علامات موسيقية ضيّعتا من سنين,هو أحلى شي ما صار..
سيبنا من الدراما هلأ شو رح تعمل؟
يا صديقي نحنا منكتب لننسى, منعزف لنتذكّر....رح اعمل التنتين...
                                                                          من حبّ بنص الأزمة....
                                                                          دمشق , 5:30 صباحاً